Reuters

Forseti fulltrúadeildarinnar á Spáni, sósíalistinn José Bono, gagnrýnir kaþólsku kirkjuna fyrir það hversu illa hún hafi höndlað ásakanir um kynferðisofbeldi gagnvart börnum. Sjálfur segist hann þeirrar skoðunar að hætta eigi að krefjast skírlífis af prestum.

„Stjórnendur kaþólsku kirkjunnar hafa tekið einstaklega klaufalega á þessu máli með því að lýsa því ekki skýrt og skorinort yfir að nokkur rotin epli eyðileggi ekki öll eplin í körfunni,“ sagði Bono, sem sjálfur er kaþólskur, í viðtali við spænska sjónvarpið.

„Það felst hreinlega móðgun í því að hugmyndin um presta sem barnaníðingar fái að vaxa og dafna óáreitt,“ sagði hann og lagði áherslu á að fordæma ætti níðingsverk þeirra presta sem gerðust sekir um barnaníð.

Bono velti upp þeirri spurningu hvers vegna kaþólskum prestum væri gert að lifa skírlífi á sama tíma og kaþólskum prestum í Asíu væri leyft að kvænast. „Ef hjónabönd kaþólskra presta eru leyfð í sumum heimshornum af hverju þá ekki í öðrum,“ spurði Bono. Vísaði hann þar til þess að fulltrúar Páfagarðs hafa ávallt neitað því að tengsl séu milli kröfunnar um skírlífi presta og kynferðislegri misnotkunar presta gagnvart börnum.

Kaþólsk trú er mjög útbreidd á Spáni. Þar í landi hafa enn ekki komið upp sambærileg hneykslismál  í tengslum við kynferðislega misnotkun kaþólskra presta á börnum líkt og komið hafa upp á Írlandi, Þýskalandi og Bandaríkjunum á síðustu vikum.