Tvívegis hefur verið brotist inn í hús hjóna sem fórust í flugslysi við Sæby á Norður-Jótlandi á annan dag páska. Tvær dætur hjónanna voru með þeim í flugvélinni og lifðu þær flugslysið af. Sú eldri, 25 ára gömul, lést í gær af sárum sínum. Systir hennar, 17 ára, er enn á sjúkrahúsi í Álaborg.

Athafnamaðurinn Niels Birch Nielsen var á ferð með fjölskyldu sinni í einkaflugvél þeirra af gerðinni Piper Cherokee Warrior PA-28 151 þegar flugvélin fórst við Sæby. Þau voru á leið frá Læsø til Sindal, að sögn Berlingske Tidende.

Fyrst var brotist inn í hús fjölskyldunnar, í Horne norðan við Hjørring, aðfaranótt þriðjudagsins eftir páska.  Aftur var brotist inn í húsið síðastliðna nótt. Talsmaður lögreglunnar telur að tengsl séu á milli innbrotanna. Innbrotsþjófunum tókst að komast hjá því að gangsetja viðvörunarkerfi hússins.

Í fyrra innbrotinu var farið inn um svalahurð og rótað í ýmsum hirslum. Þá var stolið tveimur sérhönnuðum stólum, minkapels og skartgripum. Þjófarnir fundu lyklana að Mercedes bifreið húsbóndans og stálu henni. Bíllinn fannst á þriðjudagsmorgun með sprungið dekk. 

Í nótt sem leið stálu þjófar öðrum bíl fjölskyldunnar, VW Touran, sem lögreglan hefur lýst eftir. Lögreglan í Norður-Jótlandi vinnur að rannsókn málsins. Hún segir fleiri dæmi um að þjófar hafi notfært sér slys og dauðsföll fólks til að brjótast inn í heimili.