Suður-kóreskir sjóliðar, sem var bjargað úr herskipi sem sökk skammt frá Kóreuskaga fyrir tæpum tveimur vikum, hafa nú tjáð sig opinberlega um atburðinn. Skipið sökk á umdeildu hafsvæði sem liggur á milli Norður- og Suður-Kóreu.

Alls voru 104 sjóliðar um borð og var 58 bjargað áður en skipið brotnaði í tvennt og sökk.

Þeir greindu frá atburðinum í fyrsta sinn í dag. Margir þeirra segjast hafa heyrt háan hvell skömmu áður en skipið fór að sökkva. 

„Ég kastaðist í loft upp þegar hvellurinn varð og þá fór rafmagnið af. Ég fékk tölvu í mig og það leið yfir mig. Þegar ég vaknaði úr rotinu þá var myrkur allsstaðar, ég gat ekki séð neitt,“ Oh Seong-Tak, sem var yfirmaður um borð í skipinu.

„Ég þreifaði á veggjunum og leitaði að hurð, en ég fann enga hurð. Svo fann ég fyrir einhverju undir fótunum. Ég kom við það og áttaði mig á því að þetta var hurð á botninum. Þetta þýddi að skipið hafði hallað um 90 gráður um leið og hvellurinn heyrðist,“ segir hann ennfremur.

Búið er að finna eitt lík en enn er unnið að því að leita að 46 sjóliðum, sem talið er að séu fastir um borð í skipinu.

Sjóliðarnir segjast hafa verið að sinna hefðbundnum skyldustörfum þegar skipið fór niður. Suður-kóresk yfirvöld segja að þegar skipið verður dregið á land muni koma í ljós hvað gerðist. Þau hafa ekki útilokað þann möguleika að norður-kóreskt tundurskeyti hafi hæft herskipið.