Sendimaður frá Katar, sem olli miklu uppnámi í Bandaríkjunum í gærkvöldi þegar hann kveikti sér í sígarettu inni á salerni farþegaflugvélar, var látinn laus úr haldi lögreglu í Detroit í dag og verður ekki ákærður vegna málsins. Óttast var að maðurinn væri að reyna að sprengja flugvélina.

AFP fréttastofan hefur eftir ónafngreindum bandarískum embættismanni, að þótt það sé brot á alríkislögum að reykja inni á salernum flugvéla muni sendimaðurinn væntanlega sleppa við ákæru þar sem hann njóti friðhelgi sem erlendur diplómat. Hefði hann verið bandarískur ríkisborgari hefði engin vægð verið sýnd.  

Maðurinn heitirMohammed al-Modadi, er 27 ára og starfar í sendiráði Katar í Washington. Lögreglumenn um borð í farþegaflugvél United Airlines, sem var á leið frá Washington til Denver, handtóku manninn um borð í flugvélinni eftir að hann kveikti í sígarettu um borð í vélinni en þegar flugfreyjur spurðu al-Modadi hvað hann væri að gera sagðist hann vera að reyna að kveikja í skónum sínum.

Bandaríski flugherinn sendi orrustuflugvélar á loft og fylgdu þær flugvélinni til lendingar í Denver. Þá var Barack Obama, Bandaríkjaforseta, skýrt frá málinu.  

Sendiherra Katar í Washington sagði í yfirlýsingu í dag að sendimaðurinn hefði verið á leið til Denver í opinberum erindagerðum og engin ógn hafi stafað af honum. Staðreyndir málsins sýni að um mistök hafi verið að ræða.

Brestinn Richard Reid reyndi árið 2001 að sprengja farþegaflugvél, sem hann var í, með því að kveikja í heimatilbúinni sprengju í skóm sínum. Þá reyndi nígerískur maður að sprengja flugvél yfir Bandaríkjunum um síðustu jól með því að kveikja í sprengju sem hann faldi í nærfötum sínum.