Líkklæðið frá Tórínó til sýnis

Svonefnt líkklæði frá Tórínó, sem margir trúa að sé líkklæði Jesú Krists, verður sýnt opinberlega í Tórínó í dag í fyrsta skipti í áratug. Búist er við að um 2 milljónir manna muni skoða klæðið þar næsta eina og hálfa mánuðinn.

Um er að ræða klæði sem er 4,4 metrar á lengd og 1,1 metri á breidd. Mynd af andliti sést á klæðinu, sem margir telja að sé ásjóna  Krists sjálfs, en sagan segir að klæðinu hafi verið vafið utan um jarðneskar leifar hans þegar hann var tekinn niður af krossinum á Golgata.

Það fannst í frönsku borginni Troyes á miðri 14. öld. Geislakolsmælingar sem gerðar voru 1988 virtust sýna fram á að þræðirnir í klæðinu væru frá miðöldum, milli 1260 til 1390, en þær niðurstöður hafa verið dregnar í efa.

Benedikt XVI páfi mun skoða klæðið í byrjun maí. Það var síðast sýnt opinberlega í Róm árið 2000.

• 1 blogg um fréttina

Bloggað um fréttina

• Axel Jóhann Hallgrímsson: Hangið á lyginni.