Bandaríkjamenn hafa, líkt og aðrar þjóðir, vottað Pólverjum samúð sína vegna harmleiksins í Rússlandi í gær. Þannig hefur fjöldi fólks komið að pólska sendiráðinu í New York með blóm og kerti til að finnast fórnarlamba flugslyssins. Barack Obama hringdi í forsætisráðherra Póllands, Donald Tusk, í gær með samúðarkveðjur.

Pólverjar í New York fjölmenntu í kirkjur í gær þar sem minningarathafnir voru haldnar. Við eina kirkju höfðu svartir borðar verið bundnir við pólska fána. Reuters hefur eftir pólskum presti þar í borg að samlandar hans hafi orðið fyrir miklu áfalli í gær. Minningarathöfnin hafi verið magnþrungin og sorgin yfirþyrmandi.

Sem kunnugt er fórust allir um borð í forsetaflugvélinni, 97 manns; forsetinn og eiginkona hans, háttsettir embættismenn og herforingjar, á leið til minningarathafnar í Rússlandi vegna fjöldamorða á pólskum hermönnum í Katyn-skógi á stríðsárunum.

Búið er að bera kennsl á lík forsetans, Lech Kaczynskis, en líkin úr slysinu hafa verið flutt til Moskvuborgar. Viku þjóðarsorg hefur verið lýst í Póllandi og fjöldi fólks hefur komið að forsetahöllinni í Varsjá til að votta hinum látnu virðingu sína.