Flogið var í dag með lík Lech Kaczynski, forseta Póllands til Varsjár, ásamt líkum einhverra þeirra 95 sem einnig fórust í flugslysinu í gærmorgun. Tekið var á móti líkamsleifunum með hernaðarlegri viðhöfn áður en þær voru fluttar til forsetahallarinnar, þar sem fólk hefur safnast saman til að votta Kaczynski virðingu sína. Viku þjóðarsorg hefur verið lýst í Póllandi.

Forsetinn, yfirmenn hersins og þingmenn pólska þingsins voru á leið til Smolensk í Rússlandi til að taka þátt í minningarathöfn um rúmlega 20 þúsund pólska liðsforingja og liðsforingjaefni sem Sovétmenn myrtu í Katyn-skógi 1940 þegar flugvélin fórst. Engir þeir sem í vélinni voru lifðu slysið af og segja yfirvöld í Rússlandi flugmenn hafa flogið vélinni of lágt.

Bronislaw Komorowski, forseti pólska þingsins sem nú gegnir embætti forseta tók þátt í athöfninni á flugvellinum í Varsjá, ásamt forsætisráðherranum, Donald Tusk, og Jaroslaw Kaczynski, bróður forsetans.

Eftir stutta trúarathöfn var kistan keyrð í hernaðarfylgd til forsetahallarinnar þar sem almenningur mun geta vottað Kaczynski virðingu sína. Lík forsetafrúarinnar Maríu Maria Kaczynska, sem einnig fórst í slysinu, er þó enn í Rússlandi þar sem ekki hefur tekist að bera kennsl á líkamsleifar hennar.

Messur í minningu hinna látnu hafa verið haldnar víðsvegar um Pólland, auk tveggja mínútna klukkuspils og sírenuhljóms í morgun.  Á sama tíma söfnuðust landsmenn saman á torgum og götum bæja og stóðu saman í þögn.

 Vladimír Pútin, forsætisráðherra Rússlands, tók þátt í  minningarathöfn um fórnarlömb slyssins í Rússlandi í gær og segir BBC hann hafa heitið því að hafa persónulega umsjón með rannsókn slyssins. Hafa rússnesk og pólsk yfirvöld nú fundið flugrita vélarinnar og vinna að sameiginlegri rannsókn.

Ekið með lík forsetans um götur Varsjár í dag. INTS KALNINS