Wikileaks virðist luma á fleiri myndböndum frá bandaríkjaher.

Wikileaks vefurinn undirbýr nú að birta myndband af loftárás Bandaríkjamanna í Afganistan, sem sögð er hafa orðið fjölda manns að bana.  Að sögn breska dagblaðsins Daily Telegraph er um að ræða myndefni úr bandarískri herflugvél sem send var til að varpa sprengjum á uppreisnarmenn Talibana í Farah héraðinu á síðasta ári. 

Afgönsk stjórnvöld  sögðu á þeim tíma sem árásirnar voru gerðar að þær hefðu orðið 147 almennum borgurum að bana. Óháð afgönsk rannsókn sýndi síðar að 86 höfðu farist.

Myndefni af árásinni er talið geta komið illa við afgönsku stjórnina, sem nýtur stuðnings Nato, sýni myndbandið að flugmennirnir hafi lítið gert til að tryggja öryggi almennra borgara.

Átakanlegt myndband úr bandarískri herþyrlu sem sýndi hermenn skjóta á íraska borgara í Bagdad, þar með talið tvo blaðamenn, vakti mikla reiði er það var birt á vef Wikileaks í síðustu viku. 

Einungis brot var birt af rannsókn Bandaríkjamanna á atburðunum í Farah 4. maí í fyrra. Þar var áætlað að 26 manns hefðu látið lífið, en þó sleginn sá varnagli að „enginn muni nokkurn tímann geta ákveðið endanlega hversu margir almennir borgarar féllu.“

Herflugvélarnar vörpuðu ítrekað 500  og 2.000 punda sprengjum á meðan að hermenn börðust við vopnaða Talibana og reyndu að koma særðum hermönnum undan.

„Vangeta til að aðgreina almenna borgara og forðast/ eða lágmarka þann fórnarkostnað olli óviljandi falli almennra borgara,“ sagði í bandarísku skýrslunni.

Talsmaður afgönsku stjórnarinnar kveðst hafa heyrt að Wikileaks hyggist birta myndefnið. Starfsmenn Wikileaks segja sæta ógnunum og að bandaríska leyniþjónustan reyni nú að loka vefsvæðinu eftir í kjölfar þeirra gagna sem birt hafa verið á vefnum undanfarið.