Frá slysstað á flugvellinum í Smolensk. Reuters

Hugsanlega má rekja flugslysið í Rússlandi, þar sem forseti Póllands ásamt fylgdarliði lést, til þess að flugstjórinn hafi losað sig við of mikið eldsneyti í aðdraganda þess að hann reyndi ítrekað að lenda á flugvellinum Smolensk. Frá þessu er greint í rússneskum fjölmiðlum, þeirra á meðal tímaritinu Russian Today og fjölda sjónvarpsstöðva. Kenningin hefur þó ekki verið staðfest opinberlega.

Eftir því sem rússneskir fjölmiðlar greina frá ákvað flugstjórinn að losa sig við stóran hluta af eldsneyti vélarinnar áður en hann reyndi fyrstu af fjórum tilraunum sínum til þess að lenda. Mun tilgangurinn hafa verið að gera vélina léttari og stuðla þannig að auðveldari lendingu.

Afleiðingin var hins vegar sú að hann eftir þriðju misheppnuðu til lendingartilraunina hafði ekki val um annað en að lenda vélinni í næstu tilraun þrátt fyrir óásættanleg veðurskilyrði. Það var í fjórðu tilrauninni sem vélinni hlekktist á, rakst utan í tré og hrapaði til jarðar með þeim afleiðingum að forsetahjón Póllands ásamt fylgdarliði lést.

Flugsérfræðingar telja miklar líkur á því að flugstjórinn hafi verið undir miklu álagi vegna allra þeirra hátt settu embættismenn sem í vélinni voru, þeirra á meðal aðstoðarutanríkisráðherra, varnarmálaráðherra og æðsti yfirmaður pólska flugflotans.

Farþegar vélarinnar voru á leið Smolensk, í vesturhluta Rússlands, til að minnast þess að 70 ár eru nú liðin frá Katyn blóðbaðinu þegar að hersveitir Sovétmanna drápu þúsundir Pólverja. Þeir hefðu ekki náð athöfninni í tæka tíð ef flugstjórinn hefði hlýtt fyrirmælum rússneskra flugumferðarstjóra þess efnis að fljúga annað hvort til Moskvu eða Minsk og lenda þar.

Bæði rússneskir og pólskir sérfræðingar á sviði flugmála eru nú að rannsaka svörtu kassa flugvélarinnar sem og aðstæður á slysstað.