Sífellt berast nýjar upplýsingar sem menn vonast til að geti varpað ljósi á hið hörmulega flugslys í Rússlandi þegar flugvél forseta Póllands hrapaði með þeim afleiðingum að allir um borð létust.

Samkvæmt því sem fram kemur í rússneskum fjölmiðlum átti pólski flugstjórinn og rússneski flugumferðarstjórinn erfitt með að skilja hvor annan og telja menn að það hafi leitt til þess hvernig fór.

„Flugstjórar eiga að gefa upp flughæð sína áður en þeir byrja að reyna að lenda, en það var ekki gert í þessu tilviku,“ segir Paul Plyusnin, flugumferðarstjóri á Smolensk flugvellinum, í samtali við rússneska fjölmiðilinn Life News.

Að sögn flugumferðarstjórans reyndist flugstjóranum erfitt að gefa upplýsingar um flughæð vélar sinnar þar sem hann talaði litla sem enga rússnesku. Segir hann samtal þeirra hafa farið fram á rússnesku, en að það hafi tekið langan tíma áður en flugstjórinn gat svarað þeim spurningum sem flugumferðstjórinn beindi til hans.

Paul Plyusnin segist hafa hvatt flugstjórann til að velja annan flugvöll þar sem mikil og þykk þoka lægi yfir flugvellinum í Smolensk og því væri völlurinn í reynd ekki nothæfur.

„Ég ráðlegg þér eindregið frá því að lenda hér,“ segist flugumferðastjórinn hafa sagt við flugstjórann. Þrátt fyrir þessa viðvörun reyndi flugstjórinn í fjórgang að lenda vélinni á Smolensk flugvellinum. Í síðustu tilrauninni rakst flugvélin í tré með þeim afleiðingum að hún hrapaði til jarðar og fórust allir sem um borð voru.

Fyrr í dag kom í rússneskum fjölmiðlum fram að flugstjórinn hefði losað sig við stóran hluta af eldsneyti vélarinnar fyrir fyrstu lendingartilraun sína, en slíkt þykir fáheyrt í flugbransanum. Það á að hafa verið ástæðan fyrir því að flugstjórinn sé sér ekki fært að fljúga vélinni á annan flugvöll og hélt því til streitu að lenda í Smolensk.

Í öðrum rússneskum fjölmiðlum hefur verið gefið í skyn að Kaczynski forseti Póllands hafi sjálfur sett pressu á flugstjórann að lenda í Smolensk.

Enn er ekki vitað fyrir víst hvað olli flugslysinu, en verið er að rannsaka svörtu kassa vélarinnar. Dimitri Medvedev Rússlandsforseti hefur komið á fót rannsóknarnefnd um málið sem Vladimir Putin forsætisráðherra landsins fer fyrir.