Mótmælendur hafa komið sér beina nú aðgerðum sínum að helsta verslanahverfinu í Bangkok. Reuters

Taílenski herinn hefur sent hundruð hermanna inn í fjármálahverfi Bangkok til að hindra að mótmælendur úr röðum stjórnarandstæðinga komist inn í hverfið.

Mótmælin, sem haldin hafa verið í á fimmtu viku, beinast nú að verslanahverfi borgarinnar. Eru mótmælendur að þrýsta á Abhisit Vejjajiva, forsætisráðherra landsins að segja af sér og boða til kosninga. Áður höfðu þeir látið berast út að mótmælin yrðu næst flutt yfir í fjármálahverfi Bangkok, en tilkynntu síðar að af því yrði ekki.

Stjórnvöld segja veru hersins í fjármálahverfinu ekki til komna af að ráðast eigi á mótmælendur, heldur einfaldlega til að hindra þá í að komast inn í hverfið.

Herinn fer einnig eftirlitsferðir um Patpong, sem er rauða hverfið í Bangkok, og um Silom Road, þar sem höfuðstöðvar Bangkok bankans eru staðsettar ásamt fjölda opinberra bygginga.

Fréttavefur BBC hefur eftir talsmanni hersins að unnið sé að aðgerðaáætlun sem binda eigi endi á mótmælin. Aðgerðirnar yrðu þó, að hans sögn, í réttu hlutfalli við mótmælin.

Á sunnudag tilkynntu stuðningsmenn stjórnarinnar að stjórnvöld hefðu til vikuloka að binda endi á mótmælin, ellegar standi þeir fyrir sínum eigin mótmælum. En samtökin höfðu áður hvatt til þess að herlög yrðu sett í landinu.