Líkt við viðbrögð stjórnvalda vegna svínaflensunnar
Ekki eru allir á því að askan úr Eyjafjallajökli sé flugi jafn hættuleg og talið hefur verið. Ragnar Axelsson
„Sú snögga ákvörðun að loka á flug síðasta fimmtudag var meira byggð á ótta en vísindum,“ hefur AFP-fréttastofan eftir Jean-Dominique Giuliani, forstjóra Schuman stofnunarinnar í Evrópufræðum. „Getur verið að hinn sökudólgur sé raunverulega lögmál varfærninnar. Þessi táknmynd óttans sem þeir hræðast sem ákvarðanirnar taka?“ spurði Giuliani.
Lokun flugvalla í Evrópu vegna öskufalls frá eldgosinu í Eyjafjallajökli hefur haft áhrif á flug langt út fyrir álfuna og orðið umtalsefni fjölmiðla víða um heim.
„Heilbrigðis- og öryggis dómsdagurinn sem ég hef svo lengi óttast er runninn upp,“ skrifar Simon Jenkins í breska blaðinu Guardian. „Það var nógu slæmt þegar að bjáni með skósprengju varð þess valdandi að jafn heimskir stjórnendur þvinguðu flugfarþega til að bera milljóna punda kostnað og óþægindi til að hindra að slíkt gerðist aftur. Nú er það eldfjall og smá aska og það er annað svínaflensutilfelli.“
Leiðari í ástralska dagblaðinu The Australian tekur í sama streng og lýsir því yfir að aðgerðirnar hafi verið svívirða úr öllu samhengi. Aðgerðirnar sem flugyfirvöld í Evrópu gripu til hafi verið „byggðar á hugmyndinni að ríkinu beri skylda til að vernda okkur gegn öllum mögulegum náttúruhamförum og mannlegri meinsemd,“ segir í leiðaranum. „Fyrir ári síðan fylltust heilbrigðisyfirvöld og stjórnmálamenn skelfingu fyrst og spurðu svo spurninganna síðar vegna svínaflensunnar. Sem reyndist svo (a.m.k. til þessa dags) faraldurinn sem aldrei var.“
Flugfélög hafa orðið fyrir gífurlegu fjárhagstjóni vegna flugbannsins og hafa þau barist hart fyrir sveigjanlegra viðhorfi til hættunnar vegna öskufallsins, en ítrekað þó á sama tíma að öryggi farþega verði að hafa í fyrirrúmi.
„Með áhættumati ætti að vera hægt að opna vissar flugleiðir ef ekki allt svæðið,“ sagði Giovanni Bisignani, yfirmaður IATA eftir að nokkur flugfélög stóðu fyrir könnunarflugi um bannsvæðið. „Þessi flugkrísa hefur varað nógu lengi til að við byrjum að lýsa yfir óánægju okkar með það hvernig yfirvöld hafa tekist á við vandann.“
Talsmenn British Airways segja tilraunaflug félagsins sýna að askan hafi ekki valdið vélum félagsins neinum vanda, sem staðfesti að núverandi flugbann væri ónauðsynlegt. 40 önnur tilraunaflug sem farin voru um evrópska lofthelgi hafi ekki heldur bent til vélavanda vegna öskunnar.
Flugbannið, sem er hið mesta frá hryðjuverkunum í Bandaríkjunum 11. september 2001 beindi einnig kastljósinu að skorti á samhæfingu hjá Evrópuþjóðum. Enginn ákvörðun hafi legið fyrir um hversu mikið magn ösku þyrfti að mælast í andrúmslofti svo flug væri bannað.
Yfirvöld í Evrópu hafa þó haldið fast í ákvörðun sína. „Við vitum vel að þetta eru erfiðir tíma fyrir flugfélögin,“ sagði Jose Blanco samgönguráðherra Spánar. Öryggi sé hins vegar fyrir öllu. Dominique Bussereau, samgönguráðherra Frakklands tók í sama streng. „Ég held að í málefnum flugöryggis þá sé aldrei hægt að fara of varlega.“
Franska viðskiptablaðið Les Echos segir evrópsk yfirvöld vissulega mega sæta gagnrýni fyrir að hafa tekið langan tíma í að heimila flug á ný. „Það er hins vegar allt annað mál að efast um þá ákvörðun að loka algjörlega evrópskri lofthelgi,“ sagði blaðið.
Dagblaðið L'Alsace kom hins vegar með annars konar rök. „Yrðu einhver flugóhöpp í dag hefði það þýtt að flugyfirvöld yrðu sökuð um vítavert gáleysi.“
