Kurt Westergaard. Reuters

Danski skopteiknarinn Kurt Westergaard, sem vakti mikla reiði múslima með skopmynd af Múhameð spámanni með sprengju í vefjarhetti sínum árið 2005, segist hafa verið sendur í ótímabundið leyfi af öryggisástæðum.

„Ég var neyddur í frí og það lítur út fyrir að það eigi að setja mig á eftirlaun," sagði Westergaard við AFP fréttastofuna. Westergaard, sem er 75 ára að aldri og hefur teiknað í Jyllands-Posten, segist hins vegar vilja vinna áfram. Hann segist ætla að ræða við ritstjóra blaðsins í byrjun júní og ræða stöðu sína.

Reynt hefur verið ítrekað að ráða Westergaard af dögum, síðast á nýársdag þegar sómalskur íbúi í Danmörku ruddist inn í íbúð hans vopnaður öxi og hnífi. 

Jyllands-Posten leyfir oft starfsmönnum að vinna áfram þótt þeir séu komnir á eftirlaunaaldur. Westergaard segist hins vegar telja, að blaðið vilji losna við hann „af öryggisástæðum."  

„Ég er orðinn blaðinu of þung byrði og ógna öryggi þess," sagði Westergaard og bætti við að hann hefði í raun ekkert unnið á Jyllands-Posten frá því í nóvember. „Stjórnendur blaðsins hafa áhyggjur af stöðunni eftir að tveir menn voru handteknir í Chicago og reyndust hafa undirbúið sprengjuárás á Jyllands-Posten. Einnig bætti árásin á mig í janúar ekki úr skák."