Mennirnir eiga það sammerkt að hafa gagnrýnt Vladimir Putin, forsætisráðherra og fyrrverandi forseta. RIA NOVOSTI

Þrír stjórnarandstæðingar í Rússlandi hafa síðastliðna viku lent í einu og sama kynlífshneykslinu. Myndband fór af stað á internetinu, sem sýndi þá alla að stunda kynlíf með sömu stúlkunni, í sama svefnherberginu, en á mismunandi tímum.

Hefur þetta vakið upp vangaveltur um það hvort þeir hafi verið leiddir í gildru af FSB, leyniþjónustu Rússlands. Forveri hennar, KGB, sérhæfði sig á sínum tíma í því að leiða menn í slíka gildru, til þess að geta svo hótað þeim eða fjárkúgað þegar á þurfti að halda.

Mennirnir þrír eru Viktor Shenderovich, frjálslyndur penni sem skrifað hefur gagnrýnið um Vladimir Pútín forsætisráðherra, Eduard Limonov, stofnandi bolsévíkaflokksins sem hefur verið bannaður og Alexander Belov, fyrrverandi leiðtogi hins þjóðernissinnaða flokks Hreyfing gegn ólöglegum innflytjendum. Shenderovich og Belov, sem báðir eru kvæntir, hafa staðfest við fjölmiðla að það séu þeir sem sjáist á myndbandinu.

Stúlkan á myndbandinu er löguleg, brúnhærð fyrirsæta sem gengur undir nafninu Katya. Hún fær mennina upp á herbergi sín með tilboðum sem erfitt er að hafna. Í herberginu eru faldar myndavélar og myndefnið svo klippt saman svo úr verði sem allra hneykslanlegast athæfi. Allt að sex manns hafa nú látið Kötju ginna sig, og eiga það allir sammerkt að hafa gagnrýnt Pútín.

Myndbandið hefur vakið mikla reiði í rússneskum bloggheimum og fjölmiðlum, og dregið mjög úr vægi mannanna sem þar sjást og áliti fólks á þeim. „Í meira en tíu ár hef ég gert athugasemdir við athæfi herra Pútíns og bolabrögð stjórnar hans… (þeir) hlustuðu áhugalausir á mig og neituðu engu, en svöruðu svo með þessum ólöglega sora,” hefur Shenderovich skrifað á bloggið sitt.

Limonov, sem er fráskilinn, bloggaði einnig um myndbandið. „Ég sé ekkert athugavert við þá staðreynd að stjórnarandstæðingar séu ekki frábitnir konum.“

Talið er að þeir sem gerðu myndbandið hafi kunnað vel til verka. Nafnlaus hópur kom því af stað, á vefsíðu sem kennd er við áður óþekkt samtök, Hina borgaralegu nefnd um vernd siðgæðis, laga og samfélagssáttmála.

Mörg sjónarhorn eru í myndbandinu, auk þess sem tónlist og myndbrot úr vinsælum gamanþætti eru notuð með til að auka á niðurlægingu mannanna. Andlit Kötju er hins vegar ruglað. Kirill Kabanov, fyrrverandi FSB-útsendari, hefur sagt dagblöðum að atvinnumenn þurfi til að gera slíkt myndband. “Það þarf að fylgjast með skotmarkinu, hlera símann hans, vita um ferðir hans fram í tímann og tryggja að hann sé grunlaus.“

Alexei Kondaurov, fyrrverandi KGB foringi, hefur hins vegar sagt að ólíklegt sé að leyniþjónustan tengist þessu. „Líklegra er að það hafi verið einkarekin öryggisfyrirtæki sem hafa haft yfir réttum tæknibúnaði að ráða.”

Málið kom fyrst upp í marsmánuði, þegar myndband kom út sem sýndi Mikhail Fishman, ritstjóra rússnesku útgáfu Newsweek, að taka kókaín við hliðina á stúlku á nærfötum einum klæða.