Þjóðþing bæði Úkraínumanna og Rússa staðfestu í morgun samning þjóðanna, sem gerir Rússum kleift að hafa svonefndan Svartahafsflota sinn áfram á Krímskaga í Úkraínu til ársins 2042 að minnsta kosti.

Samningurinn, sem þeir Dmitrí Medvedev, forseti Rússlands, og Viktor Janúkóvítsj, forseti Úkraínu, skrifuðu undir í síðustu viku, staðfestir þá stefnubreytingu, sem varð við valdaskiptin í Úkraínu fyrr á þessu ári. Þúsundir stuðningsmanna fyrri ríkisstjórnar mótmælti samningnum utan við þinghús Úkraínumanna í Kiev í morgun. 

Ýmislegt gekk einnig á inni í þingsalnum. Þar brutust út slagsmál eftir að eggjum var kastað í þingforsetann og einhver í þingsalnum sprengdi reyksprengjum.  

Samningurinn var síðan samþykktur með 236 atkvæðum. Samkvæmt honum fá Úkraínumenn 30% afslátt af rússnesku jarðgasi á næstu 10 árum gegn því að heimila Svartahafsflotanum að hafa bækistöðvar á úkraínsku landi næstu 25 árin. 

Vladímír Pútín, forsætisráðherra Rússlands, er í Kænugarði og átti í morgun fund með þarlendum ráðamönnum. Bauð hann meðal annars samvinnu um kjarnorku og viðurkenndi við fréttamenn, að afslátturinn sem Úkraínumenn fá af gasi muni setja strik í reikninginn við rekstur ríkissjóðs Rússlands.