Víðsvegar um heiminn komu launþegar saman og kröfðust bættra kjara í 1. maí kröfugöngum. Átök brutust út í borgum víðsvegar um Grikkland en Grikkir eru afar ósáttir við fyrirhugaðar aðgerðir stjórnvalda vegna efnahagsástandsins. Hundruð þúsunda tóku þátt í kröfugöngum í Frakklandi í dag og olli þátttakan vonbrigðum verkalýðsleiðtoga sem áttu von á því að fleiri myndu mæta og mótmæla fyrirhuguðum breytingum á eftirlaunakerfi landsins.

Á síðasta ári tóku um 1,2 milljónir Frakka þátt í kröfugöngum á 1. maí en nú er talið að þeir hafi verið mun færri eða 300 þúsund á landsbyggðinni og 45 þúsund í höfuðborginni, París.

Tugir þúsunda tóku þátt í kröfugöngum á Spáni í dag en þar ríkir mikil reiði vegna aðhaldsaðgerða stjórnvalda en yfir 20% spænsku þjóðarinnar er án atvinnu.

Í Bandaríkjunum er þess vænst að um eitt hundrað þúsund kæmu saman í Los Angeles í dag. Einkum eru það nýleg innflytjendalög í Arizona sem mótmælt var. En mótmæli voru fyrirhuguð í yfir sjötíu borgum í Bandaríkjunum í dag og voru það einkum fólk frá rómönsku Ameríku sem ætlaði að mótmæla hertri innflytjendalöggjöf í Arizona.

Í Asíu tóku tugir þúsunda þátt í kröfugöngum í dag og kröfðust hærri launa og bættra vinnuskilyrða.