Lögregluyfirvöld í Kanada hafa ákveðið að setja hömlur við notkun rafbyssa (e. taser) við löggæslu í kjölfar dauðsfalls pólsks innflytjenda árið 2007, en hann var fimm sinnum skotinn með slíkri byssu. Lögreglumenn mega aðeins nota slík vopn á einstakling sem hefur valdið líkamlegu tjóni eða er líklegur til þess. Auk þess verða lögreglumenn að vara viðkomandi við, áður en rafbyssu er beitt.

Ástæða endurskoðunar kanadískra lögregluyfirvalda er mál Pólverjans Robert Dziekanski sem var fertugur þegar hann kom til Vancouver. Dziekanski var að flytja til Kanada til þess að búa með móður sinni, sem býr í Bresku-Kólumbíu. Hann talaði enga ensku og var að ferðast utan Póllands í fyrsta skipti á ævinni.

Dziekanski missti stjórn á skapi sínu á alþjóðaflugvellinum í Vancouver og skipti þá engum togum. Fjórir lögreglumenn komu aðvífandi, skutu hann fimm sinnum með rafbyssu og beittu svo afli til að halda honum niðri. Dziekanski var látinn þegar sjúkraliðar komu á vettvang.

Fallið var frá því að ákæra lögreglumennina eftir rannsókn á atvikinu. Hún leiddi í ljós að maðurinn hefði ekki dáið vegna rafstuðsins eins, heldur einnig vegna þess að honum var haldið niðri við handtökuna og vegna slæms líkamlegs ástands hans eftir langvarandi áfengisdrykkju.

Þegar hleypt er af rafbyssum skjótast út tvær pílum, tengdar með þráðum. Sá sem fær pílurnar í sig fær um leið 50.000 volta rafstraum sem er nóg til að lama viðkomandi um stundarsakir.