Spenna á milli hinna rauðklæddu mótmælenda á götum Bangkok á Taílandi og lögreglunnar hefur aukist á ný eftir að tveir féllu í sprengjuárás og skotárásir í gærkvöldi. Talið er að vel á annan tug manna hafi særst.

Viðbúnaður á götum Bangkok var aukinn til muna eftir átökin. Þau brutust út um það leyti og talsmenn rauðliðanna úr röðum stjórnarandstöðuna íhuguðu að láta af aðgerðum sínum. Þeirra helsta krafa er að þingið verði leyst upp og efnt verði til nýrra kosninga í landinu.

Haft er eftir talsmanni forsætisráðherra, Aphisit Vejjajiva, að gripið verði til enn hertari öryggisgæslu og aðgerða stjórnvalda ef ekki náist samkomulag við stjórnarandstæðinga.

Á blaðamannafundi rauðliða í dag komu fram miklar áhyggjur þeirra af þróun mála og aukinni hörku lögreglu og hers. Kölluðu þeir eftir því að einhverjir tækju á sig ábyrgð á árásum lögreglu gagnvart almenningi á götum borgarinnar.

Þrjár sprengjur sprungu í gærkvöldi, þar sem m.a. einn lögreglumaður lét lífið og nokkrir særðust. Átökin í Bangkok hafa nú staðið yfir í tvo mánuði en forsprakkar mótmælanna koma úr röðum stuðningsmanna fyrrum forsætisráðherra landsins, Thaksin Shinawatra.