Verðbólgan jókst til muna í Kína í kjölfar þess að húsnæðis- og matarverð hækkuðu ásamt því að útlánum banka fjölgaði. Þessar fréttir munu auka áhyggjur manna af því að stærsta hagkerfi heims sé að ofhitna og að fjármálayfirvöld landsins neyðist til þess að hækka stýrivexti.

Verð neysluvara í Kína hefur hækkað um 2,8% á einu ári og hefur ekki verið hærra í 18 mánuði. Verðhækkun fasteigna á einu ári hefur verið um 12,8%, eftir því sem fram kemur í tölulegum upplýsingum frá kínversku hagstofunni. Á sama tíma standa ný útlán í sem nemur 8,4 milljörðum bandaríkjadala.

Margir fjármálaspekingar höfðu spáð því að ársverðbólga í Kína myndi mælast 2,7%. Erlendir fjármálaspekingar fylgjast nú náið með stöðunni og bíða þess hvort kínversk stjórnvöld reyni að handstýra verðum til lækkunar, en slíkt myndi hægra á efnahagsvextinum í Kína.

Að mati Brian Jackson, sérfræðings hjá Kanadabanka, eru talsverðar líkur á því að kínverska hagkerfið geti ofhitnað. Segir hann verðhækkanir að undanförnu kalla á viðbrögð í formi hærri stýrivexti auk þess sem styrkja þyrfti gjaldmiðil landsins.

Framleiðslugeta landsins jókst um 17,8% á eins árs tímabili sem nær til apríl sl. Á sama tíma jókst smásala um 18,5%.