Þúsundir mótmælenda í Bangkok virtu að vettugi fyrirmæli yfirvalda í  Taílandi um að binda enda á mótmælin sem staðið hafa í nokkrar vikur í borginni.

Mótmælendurnir hafa reist götuvígi og vegartálma í Bangkok og yfirvöld skipuðu þeim að fara af svæðinu ekki síðar en klukkan átta í morgun að íslenskum tíma. Yfirvöldin hótuðu áhlaupi til að handtaka mótmælendur og sögðu að þeir ætti yfir höfði sér allt að tveggja ára fangelsisdóm.

Margar götur í borginni eru mannlausar vegna átakanna milli mótmælenda og öryggissveita. Að minnsta kosti 36 manns hafa beðið bana í átökunum síðustu þrjá daga, þeirra á meðal taílenskur undirhershöfðingi, sem lést á sjúkrahúsi í nótt eftir að hafa orðið fyrir skoti leyniskyttu þegar hann studdi mótmælendur. Undirhershöfðinginn Khattiya Sawasdipol varð fyrir byssukúlu þegar hann ræddi við erlendan fréttamann nálægt svæðinu þar sem þúsundir stjórnarandstæðinga hafa mótmælt síðustu vikur, reist vegartálma, kveikt í hjólbörðum og barist með heimasmíðuðum vopnum.