Hillary Clinton, utanríkisráðherra Bandaríkjanna, segir heimsveldin fimm, sem eiga fast sæti í öryggisráði Sameinuðu þjóðanna, hafi komist að samkomulagi um ályktunartillögu er varðar nýjar refsiaðgerðir á hendur Írönum.

Clinton sagði Bandaríkjaþingi að uppkast að nýrri ályktun verði dreift á fundi öryggisráðsins, sem verði að staðfesta ályktunina. Bandaríkin, Rússland, Kína, Frakkland og Bretland eiga fast sæti í öryggisráði SÞ.

Íranar gerðu í gær samning um að flytja hluta af því lítt auðgaða úrani, sem þeir eiga, úr landi í skiptum fyrir kjarnorkueldsneyti. Utanríkisráðherrar Írans, Brasilíu og Tyrklands undirrituðu samninginn og sögðu hann marka tímamót, en víða hefur hann mætt tortryggni.

Samkomulagið er áþekkt því sem Vesturveldin og bandamenn þeirra buðu í síðasta mánuði.

Íranar skuldbinda sig samkvæmt samningnum til að koma 1200 kg af lítt auðguðu úrani fyrir í Tyrklandi, það geti gerst innan mánaðar, og eiga í staðinn að ári liðnu rétt á að fá um 120 kg af 20% auðguðu úrani í eldsneyti fyrir kjarnakljúf, sem notaður er til að framleiða ísótópa til krabbameinslækninga. 

Clinton segir að mörgum spurningum sé enn ósvarað.

Recep Tayyip Erdogan, forsætisráðherra Tyrklands, hefur óskað eftir samþykki alþjóðasamfélagsins. Hann tekur hins vegar fram að ef Íranar muni ekki flytja út úran innan mánaðar, líkt og samþykkt hefur verið, þá muni Íranar glata öllum stuðningi.