Lífið er að færast í eðlilegt horf í höfuðborg Taílands, Bangkok, eftir blóðug átök í liðinni viku. Að sögn forsætisráðherra landsins, Abhisit Vejjajiva, verður starfsemi hins opinbera, svo sem skólar og ríkisfyrirtæki, starfrækt með eðlilegum hætti á morgun. 

Í dag var verið að hreinsa götur eftir mótmælin  í borginni en alls biðu 86 manns bana í átökunum í Bangkok og um 1.900 særðust.

Nokkrir sérfræðingar í málefnum Taílands telja að stjórn landsins verði að reyna að ná sáttum við Thaksin Shinawatra, fyrrverandi forsætisráðherra, eftir að öryggissveitir brutu mótmæli Rauðstakkanna svonefndu í Bangkok á bak aftur á miðvikudag. Verði það ekki gert telja fréttaskýrendurnir að mannskæð átök blossi upp að nýju.

Ríkisstjórn landsins hefur sakað Thaksin um að hafa staðið fyrir mótmælunum og borgað Rauðstökkunum fyrir að taka þátt í mótmælunum í Bangkok.

Her Taílands steypti Thaksin af stóli árið 2006 og núverandi ríkisstjórn var mynduð með stuðningi hersins um tveimur árum síðar þegar dómstóll vék stjórn bandamanna Thaksins frá. Forsætisráðherrann fyrrverandi er nú í útlegð eftir að hafa verið dæmdur í tveggja ára fangelsi fyrir spillingu. Taílenska stjórnin hefur reynt að fá ríki, sem Thaksin hefur heimsótt, til að handtaka hann og kyrrsetja eignir hans.