Vefur breska dagblaðsins Times og sunnudagsútgáfu þess, Sunday Times, hefur fengið nýtt útlit og styttist í að lesendur þurfi að greiða fyrir lestur á fréttum vefjarins. Í lok júní þarf að greiða eitt pund, tæpar 190 krónur, fyrir lestur á dagblaðinu á netinu og tvö pund fyrir viku áskrift.

Ritstjóri Times,  James Harding, segir þetta stórt skref enda hafi fréttir á netinu verið ókeypis hingað til. Það sé hins vegar þeirra tilfinning að nú sé rétti tíminn til að hætta að gefa vinnu blaðamannanna enda sé vinna þeirra ekki metin að verðleikum með því.

Rupert Murdoch, eigandi Times og Sunday Times, sagði í ágúst í fyrra að hann stefndi að því að krefja lesendur um gjald fyrir lestur á fréttum á öllum vefjum í eigu útgáfufélags hans, News Corp.

Verða Times og Sunday Times fyrstu bresku blöðin sem þarf að greiða áskriftargjald fyrir allt efni á vefjum fjölmiðlanna. Þegar þarf að greiða fyrir hluta Financial Times á netinu en ekki allar fréttir.

Bandaríska dagblaðið Wall Street Journal, sem er í eigu Murdoch, er eina bandaríska dagblaðið sem krefur lesendur um greiðslu áskriftar en lesendur New York Times þurfa að greiða fyrir áskrift á netinu á næsta ári.

 Times á netinu