Sjálfboðaliðar safnast saman við verslunarmiðstöð í Bangkok sem kveikt var í þegar upp úr sauð milli lögreglu og mótmælenda. Reuters

Stjórnvöld í Taílandi afléttu í morgun útgöngubanni, sem gilt hefur á nóttunni í Bangkok og 23 héröðum undanfarna 10 daga vegna blóðugra mótmælaaðgerða sem þar voru gegn ríkisstjórninni.

Abhisit Vejjajiva, forsætisráðherra, sagði í morgun að útgöngubanninu hefði verið alétt þar sem búið væri að ná tökum á ástandinu í landinu en neyðarlög væru áfram í gildi.  

Útgöngubannið var sett 19. maí eftir að öryggissveitir létu til skarar skríða gegn mótmælendum, sem höfðu safnast saman í Bangkok. Reiðir mótmælendur gengu berserksgang og kveiktu í byggingum. Talið er að 88 hafi látið lífið í átökum mótmælenda við lögreglu vikurnar á undan.