Yfir 120 farþegar sem voru um borð í skipunum sem Ísraelar réðust á eru komnir til Jórdaníu, samkvæmt frétt Petra fréttastofunnar. Um 680 farþegar frá 42 löndum voru fluttir til hafnar í Ashdod og 48 þeirra voru á sjúkrahúsi í gær. Í gærkvöldi greindu ísraelsk stjórnvöld frá því að 250 þeirra yrði vísað úr landi, þar á meðal 60 Tyrkjum. Þeir bíða nú eftir flugi heim á Ben Gurion flugvellinum í nágrenni Tel Aviv. Sjötíu Tyrkir eru á leið frá fangelsinu sem þeim var haldið í út á flugvöll.

Skipuleggjendur „Frelsisflotans“ svonefnda sögðust í gær ætla að reyna aftur að senda skip með hjálpargögn til Gaza-svæðisins þrátt fyrir árás Ísraelshers aðfaranótt mánudags.

Hillary Clinton, utanríkisráðherra Bandaríkjanna, varar við því að skyndiákvarðanir séu teknar í deilunni og biður um að viðbrögðin við árásinni séu tekin með yfirvegun. 

Í fréttaskýringu í Morgunblaðinu í dag um árás Ísraelsmanna kemur meðal annars fram að mannskæðri árás Ísraelshers á skipalest á leið til Gaza lýst sem klúðri og „hörmulegu sjálfsmarki“. Hún beini athygli heimsbyggðarinnar að Gaza og kyndir undir kröfum um að herkvínni verði aflétt.

„Þetta var gjöf til verstu óvina Ísraels,“ segir Ian Black, sérfræðingur breska blaðsins The Guardian í málefnum Mið-Austurlanda, í fréttaskýringu um mannskæða árás Ísraelshers á skip sem áttu að flytja hjálpargögn til Gaza-svæðisins aðfaranótt mánudags.

Black lýsir árásinni sem „hörmulegu sjálfsmarki“ sem beini athygli heimsbyggðarinnar að þeirri stefnu Ísraela að halda Gaza-svæðinu í herkví. Jafnvel dagblöð, sem hafa verið vinveitt Ísraelum, furða sig á árásinni og hvernig staðið var að henni, lýsa henni sem „martröð fyrir Ísraela í almannatengslum“ eins og Los Angeles Times orðaði það.