Stjórnvöld á Spáni hyggjast sauma enn frekar að reykingafólki þar í landi. Þannig stendur til að breyta lögum sem banna reykingar þannig að þau nái á næsta ári líka til bara, kaffihúsa, veitingahús og annarra opinberra staða. Þetta tilkynnti Trinidad Jimenez, heilbrigðisráðherra landsins í dag.

Nýju lögin muni ekki ná til hótelherbergja og prívatreykingaklúbba, né heldur til fangelsa landsins eða geðsjúkrahúsa þar sem fólk sem þar dvelji hafi ekki val um að dvelja á eigin heimili.

„Reykingar verða leyfðar á svölum, íþróttaleikvöngum, nautaatsvöllum og öðrum opnum svæðum,“ sagði ráðherrann.

Fyrstu reykingalög landsins tóku gildi í upphafi árs 2006, en samkvæmt þeim var bannað að reykja á vinnutöðum, í búðum, skólum, á spítölum, í menningarmiðstöðvum og almenningsfarartækjum.

Samtök verslunar og þjónustu á Spáni hafa lagst gegn frekari takmörkunum á reykingum í landinu. Talsmenn samtakanna halda  því fram að sala á veitingahúsum muni dragast saman um 7% og um 10-15% á börum og kaffihúsum landsins þegar reykingarbannið tekur gildi.

Stjórnvöld benda aftur á móti á að önnur Evrópulönd hafi þegar bannað reykingar á börum, kaffi- og veitingahúsum án þess að það hafi komið niður á efnahag þessara staða. Segja þeir bannið nauðsynlegt til þess að lækka dánartíðnina í landinu vegna reykinga, en árlega deyja um 50 þúsund manns vegna veikinda sem rekja má til reykinga. Lagafrumvarpið verður til umfjöllunar í spænska þinginu síðar í þessum mánuði.

Minnihlutastjórnin undir forystu Jose Luis Rodriguez Zapatero forsætisráðherra, vantar sjö atkvæði til að vera með hreinan meirihluta. Hins vegar er vitað að a.m.k. tveir þingmenn minnihlutans hyggjast styðja lagafrumvarpið og telja stjórnmálaspekingar að frumvarpið verði samþykkt.