Sjaldgæfar dýrategundir sem finnast aðeins í Eþíópíu og voru eitt sinn í alvarlegri útrýmingarhættu hafa nú náð sér á strik þökk sé vel heppnuðu dýraverndarátaki. Verulega hefur fjölgað innan nokkurra tegunda samkvæmt rannsókn sem kynnt var í dag.

Eþíópía er þekkt fyrir fjölbreytt dýralíf en margar tegundir hafa átt undir högg að sækja vegna veiðiþjófa og vegna þess að gengið hefur verið á lönd þeirra og villta náttúru. Því þykja það gleðifréttir að samkvæmt nýlegri talningu hefur m.a. einstaklingum fjölgað töluvert af tegundinni walia, villtri geit sem finnst hvergi annars staðar í heiminum. Eþíópískum úlfum hefur einnig fjölgað verulega sem og gelada-bavíönum

„Þessum dýrum hefur fjölgað langt umfram væntingar í Semien þjóðgarðinum," hefur AFP eftir umsjónarmanni garðsins, Yohannes Mekuria.  Geitunum hefur fölgað úr aðeins 50 einstaklingum árið 1992 í 751 í dag og teljast þær ekki lengur í bráðri útrýmingarhættur.

Sama má segja um eþíópíska úlfinn, því aðeins 15 úlfar voru eftir fyrir 20 árum en í dag eru þeir a.m.k. 84. Þá reyndust bavíanarnir vera 15.000 talsins og stendur stofninn því styrkum fótum. Mekuria þakkar þennan góða árangur metnaðarfullri stjórn yfir þjóðgarðinum sem og almennri fræðslu til þjóðarinnar.