Áhöfn hjálparskipsins Rachel Corrie, sem Ísraelar handtóku á leið sinni til Gasastrandarinnar, verður vísað úr landi í dag samkvæmt síðustu fregnum frá Ísrael. Alls voru 19 manns um borð, þar af 11 aðgerðasinnar en skipið siglir undir írsku flaggi.
Ísraelsher felldi níu manns um borð í öðru hjálpaskipi sl. mánudag og þar af voru nokkrir þeirra skotnir í höfuðið. Allt voru þetta Tyrkir nema að einn þeirri hafði einnig bandarískt vegabréf. Mikið mótmælaalda hefur risið vegna þessarar árásar, síðast í Lundúnum í gær þar sem þúsundir Tyrkja efndu til mótmæla fyrir utan Downing-stræti.
Samskipti Ísraela og Tyrkja hafa farið harðnandi. Framkvæmdastjóri Sameinuðu þjóðanna, Ban Ki-moon, hefur boðað rannsókn á árásinni á mánudag þar sem að koma fulltrúar frá Ísrael, Tyrklandi og Bandaríkjunum. Fyrrum forsætisráðherra Nýja-Sjálands, Geoffrey Palmer, er ætlað að stýra þeirri rannsókn.