Helena Paixao og Teresa Pires. AFP

Fyrsta brúðkaupi samkynhneigðra var fagnað í Portúgal í dag, en þar gekk lesbískt par í hjónaband í borgaralegri athöfn. Ein vika er liðin síðan lög gengu í gildi sem samþykkja hjónaband samkynhneigðra.

Konurnar tvær, Helena Paixao og Teresa Pires, giftu sig í Lissabon að viðstöddum 30 gestum.  Þær eru báðar fráskildar og eiga tvær dætur úr fyrir hjónaböndum en hafa hinsvegar verið par í 8 ár. Þær voru einnig fyrsta portúgalska parið sem óskaði formlega eftir því að fá að gifta sig, árið 2006, en í kjölfarið fór af stað mikil deila um hvort lögleiða ætti hjónabönd samkynhneigðra í landinu þar sem kaþólska er ráðandi trú.

Síðan beiðni þeirra var hafnað fyrir 4 árum hafa þær barist fyrir því að lögunum sé breytt. Í febrúar síðastliðnum samþykkti vinstri ríkisstjórnin í Portúgal svo lögin sem gera hjónaband samkynhneigðra löglegt og gengu þau lög í gildi nú í júní. Skilgreining hjónabands var breytt í lögunum með því að taka út klausu um samband karls og konu. Í lögunum er hinsvegar skýrt tekið fram að samkynhneigð hjón megi ekki ættleiða börn.

Benedikt XVI páfi gagnrýndi hjónaband samkynhneigðra og fóstureyðingu sem „lúmska og hættulega ógnun við velferð almennings" þegar hann heimsótti Portúgal í síðasta mánuði.  Með lagasetningunni  fetar Portúgal í fótspor Belgíu, Hollands, Spánar, Svíþjóðar og Noregs þar sem hjónabönd samkynhneigðra eru lögleg.