Reuters

Íranski rauði hálfmáninn hyggst senda þrjú skip hlaðin hjálpargögnum til Gaza og hvetja sjálfboðaliða til þess að leggja samtökunum lið og fylgja skipunum á leiðarenda í tilraun til þess að rjúfa hafnarbannið sem ríkt hefur í Gaza. Frá þessu er greint í írönskum ríkisfjölmiðlum.

Þar er haft eftir Abdolrauf Adibzadeh, yfirmanni Íranska rauða hálfmánans, að ákvörðunin hafi verið tekin í framhaldi af fundi samtakanna í utanríkisráðuneyti landsins. Segir hann ráðgert að senda tvö skipanna hlaðin hjálpargögnum undir lok vikunnar og þriðja skipið síðar.

Skipunum verði stefnt að Gaza í nánu samstarfi við tyrknesk stjórnvöld. Jafnframt sé ætlunin að senda flugvél með 30 tonn af lyfjum og læknisbúnaði til Egyptalands, í samráði við Egypska rauða hálfmánann, og freista þess að hægt verði að koma sendingunni áleiðis til Gaza.

„Í öðru skipinu verða 70 sjálfboðaliðar á borð við hjúkrunarfólk og læknar, en í hinu verða nauðþurftir og læknisbúnaður,“ er haft eftir Adibzadeh. Þess má geta að Íranski rauði hálfmáninn reyndi undir lok árs 2008 að senda skip hlaðið matvælum og lyfjum til Gaza, en það var stöðvað af hálfu ísraelska sjóhersins.

Stutt er síðan ísraelski sjóherinn stöðvaði skipalest sex skipa sem reyndu að rjúfa hafnarbann ísraelskra stjórnvalda á Gaza. Aðgerðir sjóhersins leiddi til dauða a.m.k. níu aðgerðarsinna auk þess sem fjöldi skipverja slasaðist.

Að sögn Ramin Mehmanparast, utanríkisráðherra Írans, eru hjálparskipin sem send eru til Gaza táknræn til þess að berjast gegn hafnarbanninu.

„Haldi þessi táknræna barátta áfram þá mun hún leiða til þess að yfirráð síonista líða undir lok, en það væri einn stærsti ósigur þeirra,“ lét ráðherrann hafa eftir sér í vefsjónvarpi ríkisins.