Sextán ára gömul stúlka, Abby Sunderland, sem hvarf er hún var að sigla einsömul í kringum hnöttinn er komin í leitirnar heil á húfi á Indlandshafi. Fjölskylda stúlkunnar hefur greint frá þessu.

Sunderland var um 3.200 km fjarlægt frá strönd Afríku og Ástralíu þegar hún sendi út neyðarkall. Faðir hennar segir að björgunarbátar séu lagðir af stað til hennar. Búið sé að staðsetja skútuna og staðfesta að Sunderland sé um borð.

„Þetta eru frábærar fréttir,“ sagði Laurence Sunderland við ABC fréttir.

Fram kemur á fréttavef breska útvarpsins að leitarmenn um borð í ástralskri flugvél hafi komið augu á skútuna, sem kallast Wild Eyes. Slæmt veður hefur verið á svæðinu en veðrinu er að slota.

Sunderland, sem er frá Kaliforníu í Bandaríkjunum, missti samband við fjölskyldu sína um klukkan 13 að íslenskum tíma í gær, en hún hafði samband við þau í gegnum gervihnattasíma. Henni tókst að virkja neyðarsenda í snekkjunni í afar slæmu veðri.

Stúlkan fylgir í fótsport bróður síns, Zac Sunderland, sem sigldi í kringum hnöttinn einn síns liðs í fyrra. Þá var hann 17 ára gamall. Hún lagði af stað frá Kaliforníu í janúar sl. og stefndi að því að slá met stóra bróður og verða yngsti einstaklingurinn sem lýkur slíkri svaðilför.

Kort sem sýnir leitarsvæðið. Reuters