Forsætisráðherra Finnlands, Matti Vanhanen, mun væntanlega óska eftir fundi með forseta Finnlands, Tarja Halonen, í dag þar sem hann leggur fram afsögn sína. Er fastlega gert ráð fyrir því að Mari Kiviniemi verði næsti forsætisráðherra Finnlands. Ef það verður þá eru tveir af fimm forsætisráðherrum Norðurlandanna konur, Jóhanna Sigurðardóttir og Mari Kiviniemi. 

Vanhanen, sem hefur gegnt embætti forsætisráðherra frá árinu 2003, greindi frá því í desember að hann ætlaði að hætta sem formaður Miðflokksins á næsta flokksþingi en það var haldið um síðustu helgi. Hann greindi einnig frá því á sama tíma að hann væri reiðubúinn til að láta af embætti forsætisráðherra áður en kjörtímabilinu lyki.

Hann sagði ástæðuna fyrir væntanlegri afsögn vera uppskurður sem hann þarf að fara í síðar á árinu en stjórnmálaskýrendur segja skýringuna allt aðra. Hið rétta ástæða séu hneykslismál sem tengjast fjármálum hans og flokksins.

Í gær að loknum fundi leiðtoga ríkja Evrópusambandsins í Brussel sagði Vanhanen við fréttamenn að hann myndi greina frá ástæðunni eftir nokkur ár. „En það er ekkert hneyksli tengt þessu. Og það munu allir örugglega skilja ástæðuna," er haft eftir Vanhanen í Helsingin Sanomat í dag.

Er líklegt að nýr forsætisráðherra verði kjörinn á finnska þinginu á þriðjudag og í kjölfarið muni Vanhanen og ríkisstjórn hans segja af sér og ný vera skipuð.

Mari Kiviniemi, 41 árs ráðherra sveitastjórnarmála, verður væntanlega næsti forsætisráðherra en hún fór með sigur af hólmi þegar formannskjör fór fram í Miðflokknum um síðustu helgi. Hún hefur setið á þingi frá árinu 1995 og varð fyrst ráðherra árið 2005.

Ef hún verður valin forsætisráðherra þá mun hún væntanlega gegna embætti forsætisráðherra þar til þingkosningar fara fram í apríl á næsta ári.