Kaare R. Norum prófessor emeritus fær norrænu lýðheilsuverðlaunin fyrir framúrskarandi rannsóknir í næringarfræði. Norum er menntaður læknir og starfaði sem prófessor við háskólann í Ósló.

 Verðlaunin eru veitt fyrir rannsóknir á heimsmælikvarða í næringarfræði sem hafa haft mikla þýðingu fyrir heilbrigði norrænna þjóða, fyrir einstaka hæfileika til þess að miðla upplýsingum í fjölmiðlum og öðrum vettvangi, og fyrir áralangt starf sem stjórnandi í samtökum og stofnunum sem gegna lykilhlutverki í lýðheilsu og lýðheilsufræðum.

Kaare R. Norum veit hvernig á að miðla rannsóknum sínum til samfélagsins og tekur virkan þátt í fjölmiðlaumræðu, samkvæmt tilkynningu frá Norðurlandaráði. Hann hefur tekið þátt í fjölmörgum sjónvarpsþáttum um mat og næringu og því er hann vel þekktur í heimalandi sínu, Noregi. Norum hefur birt meira en 300 fræðigreinar.

Rannsóknir hans hafa beinst að fitusýrum, kólesteróli, A-vítamíni og næringarráðgjöf. Þegar árið 1972 fékk hann hin virtu læknisfræðiverðlaun Anders Jahres til framúrskarandi unglækna sem starfa að rannsóknum og 1995 fékk hann verðlaun Óslóarháskóla fyrir að miðla á aðgengilegan hátt rannsóknarniðurstöðum.

Norum, sem er fæddur árið 1932, lauk námi í læknisfræði við Óslóarháskóla 1958 og árið 1966 hlaut hann doktorsgráðu í læknisfræði með ritgerð sem bar heitið Enzymic acylation of carnitine. Árið 1973 varð hann prófessor í næringarfræði.

Hann hefur gegnt ábyrgðarstöðum í fjölmörgum alþjóðlegum samtökum og leitt næringarrannsóknir á ýmsum vettvangi. Meðal annars hefur hann verið næringarráðgjafi fyrir WHO og formaður í næringarráði norska ríkisins. Hann var rektor Óslóarháskóla 1999-2001 og áður forseti læknadeildar. Árið 2005 bauð hann sig fram til þingkosninga fyrir Vinstriflokkinn.