Forseti Finnlands, Tarja Halonen, setti Mari Kiviniemi inn í embætti forsætisráðherra í dag eftir að meirihluti finnska þingsins greiddi henni atkvæði. Matti Vanhanen sagði af sér á föstudag en Kiviniemi tók við formannsembættinu í Miðflokknum af Vanhanen nýverið.

Kiviniemi, sem er 41 árs að aldri, var ráðherra sveitastjórnarmála, sagði við fréttamenn í dag að hún væri alsæl með niðurstöðu þingsins. 

Fjórir mið- og hægriflokkar eru við völd í Finnlandi. Líklegt þykir að Kiviniemi gegni embættinu fram að næstu þingkosningum sem eiga að fara fram í apríl á næsta ári. Gangi þetta eftir gegna konur tveimur valdamestu embættum Finnlands í annað skipti í sögu landsins.

Stjórnarandstæðingar kröfðust þess á föstudag að kosningunum yrði flýtt vegna afsagnar Vanhanens og sögðu að ekki væri nóg að skipta um forsætisráðherra. Stjórnarflokkarnir ætla að semja nýja starfsáætlun en ekki er búist við miklum breytingum á stefnunni.

Vanhanen er 54 ára og varð forsætisráðherra árið 2003. Hann tilkynnti í desember að hann hygðist segja af sér sem leiðtogi flokksins vegna skurðaðgerðar á fæti. Finnskir fjölmiðlar hafa þó verið með vangaveltur um að hann hafi ákveðið að víkja vegna ásakana um að hann hafi brotið lög um fjármögnun kosningabaráttu.

Kiviniemi er vel liðin á þingi og þykir afar heiðarleg og blátt áfram. Það hefur hins vegar háð henni að mörgum finnst skorta á persónutöfra hjá henni. Hún hefur reynt að halda sér fyrir utan sviðsljós fjölmiðla og þekka fáir Finnar hana í sjón. Alls greiddu 115 þingmenn af 200 henni atkvæði en 56 greiddu atkvæði á móti.

Vanhanen var meðal þeirra sem fyrst óskuðu Kiviniemi til hamingju en fast á eftir honum komu foreldrar hennar, samkvæmt fréttum finnskra fjölmiðla.