Stanley McChrystal gengur á fund Obama forseta í Hvíta húsinu í dag. Reuters

Barack Obama Bandaríkjaforseti rak fyrir stundu Stanley McChrystal, yfirmann bandaríska heraflans í Afganistan, vegna opinberrar gagnrýni hans á framgöngu Bandaríkjastjórnar í landinu. McChrystal lét ummælin falla í viðtali við tímaritið Rolling Stone.

Greint var frá brottrekstrinum eftir fund McChrystal með Obama í Hvíta húsinu og mun hershöfðinginn David Petraeus taka við stöðu hans.

Fram kemur á vef breska útvarpsins, BBC, að Hamid Karzai, forseti Afganistans, hafi gefið til kynna að hann vildi ekki að McChrystal yrði látinn víkja.

Hefur BBC jafnframt eftir heimildarmanni að fráfarandi yfirmaður heraflans í Afganistan sé hæfasti maðurinn sem leitt hafi herliðið í landinu frá því stjórn talibana var steypt af stóli haustið 2001.

Afdrifaríkt viðtal

McChrystal lét þung orð falla í áðurnefndu viðtali, „The Runaway General“, en þar gagnrýndi hann embættismenn í stjórn Obamas fyrir framgöngu þeirra í Afganistan. 

Hann hefur síðan beðið einlægrar afsökunar á ummælunum og sagt þau til marks um dómgreindarbrest, afsökun sem greinilega dugði ekki.

Fyrirsögn greinarinnar í íslenskri þýðingu er Herforingi á flótta og er það Michael Hastings sem skrifar hana. Blaðið kemur út á föstudag en McChrystal sendi frá sér afsökunarbeiðni í gær þar sem hann biðst innilegrar velvirðingar og segir að hann sýni dómgreindarskort í viðtalinu.

Í greininni segir McChrystal að honum finnist sem sendiherra Bandaríkjanna í Kabúl, Karl Eikenberry, hafi svikið sig. Þá eru höfð eftir aðstoðarmönnum McChrystal ýmis háðsyrði um varaforsetann Joe Biden og jafnframt fullyrt að McChrystal hafi orðið fyrir miklum vonbrigðum með Obama forseta.

Haft er eftir McChrystal að hann „nenni ekki einu sinni að opna" tölvupósta frá Richard Holbrooke, sérstökum erindreka Bandaríkjastjórnar í Afganistan og að öryggisráðgjafinn James Jones sé „trúður fastur í árinu 1985".

Obama sagði í gær að hann vildi ræða við herforingjann í eigin persónu áður en hann tæki ákvörðun um framhaldið. Robert Gibbs, talsmaður Hvíta hússins, segir að forsetinn sé reiður og að McChrystal hafi gert alvarleg mistök.

Barack Obama. Reuters