Mennirnir 5 voru háskólanemar í Bandaríkjunum áður en þeir fóru til Pakistan.

Fimm Bandaríkjamenn voru í dag dæmdir í 10 ára fangelsi af dómstól í Pakistan, en þeir voru fundnir sekir um að hafa skipulagt hryðjuverk á pakistanskri grundu og fyrir að styrkja ólöglega hryðjuverkahópa. Mennirnir 5 eru á aldrinum 19 til 25 ára. Þeir voru handteknir í borginni Sargodha í desember.

Mennirnir eru af pakistönskum, egypskum og eþíópískum uppruna en allir búsettir og uppaldir í Bandaríkjunum. Enginn þeirra hefur komist í kast við lögin áður en þeir fóru skyndilega af heimilum sínum í Alexandríu í Virgíniu til Pakistan í fyrra. Fjölskyldur mannanna höfðu samband við bandarísk yfirvöld eftir að þau fundu kveðjumyndband frá þeim þar sem sýndar voru upptökur úr stríðsátökum og ákall um vernd fyrir múslima.

Saksóknarar í Pakistan segja að mennirnir hafi verið á leið til Afganistan til að berjast með talíbönum. Og að þeir hafi haft samskipti við al-Qaeda í gegnum tölvupóst og YouTube.  Þeir höfðu í fórum sínum kort með viðkvæmum staðsetningum sem þótti gefa til kynna að þeir væru að skipuleggja árás.

Mennirnir hafa hinsvegar allir neitað sökum og fullyrða að þeir hafi ætlað til Afganistan til að sinna góðgerðastörfum. Þeir saka FBI og yfirvöld í Pakistan um að beita þá pyntingum og reyna að klína á þá sökum. Lögfræðingur mannanna segir að dómnum verði áfrýjað.  Réttarhöld yfir hryðjuverkamönnum í Pakistan eru lokuð fjölmiðlum.