Abby Sunderland ætlaði að sigla umhverfis heiminn á skútu, aðeins 16 ára gömul. Reuters

Bandaríska táningsstúlkan Abby Sunderland hitti loks bróður sinn er hún kom til eyjunnar Reunion í Indlandshafi, tveimur vikum eftir að henni var bjargað af laskaðri skútu á sunnanverðu Indlandshafi.

Abby, sem er sextán ára, ætlaði að verða yngst allra til að sigla í kringum heiminn á skútu en metið á bróðir hennar, Zac, sem sigldi umhverfis heiminn aðeins 17 ára gamall í fyrra.

Frá eyjunni mun Abby fara ásamt bróður sínum heim til Los Angeles. Abby var bjargað um borð í franskan fiskibát þann 12. júní eftir að mastur á skútu hennar brotnaði í brotsjó tveimur dögum fyrr.

„Allir sjófarendur vita að þegar brotsjór gengur yfir þig ertu alltaf í hættu, hvar sem þú ert staddur,“ sagði Abby við blaðamenn við komuna til eyjunnar, samkvæmt fréttavef BBC.

Tilraun hennar fékk skjótan endi þegar skútan lenti í níu metra háu ölduhafi á Indlandshafi. Abby sér þó ekki eftir neinu.

„Þú getur aldrei útilokað áhættu, þú getur dregið úr henni en áhættan er alltaf til staðar.“

Fjölskylda Abbyar hefur hafnað gagnrýni á að hafa leyft svo ungri stúlku að sigla ein sín liðs á skútu um heiminn. Hún hafi verið mjög vel útbúin og undirbúin til að takast á við þessa áskorun.