Ekki kemur til greina af hálfu skæruliða talibana í Afganistan að hefja einhvers konar samningaviðræður við Atlantshafsbandalagið (NATO) vegna átakanna í landinu. Þetta kemur fram á fréttavef breska ríkisútvarpsins BBC í morgun. Háttsettir herforingjar í herjum Breta og Bandaríkjamanna hafa viðrað þær hugmyndir nýlega að hugsanlega væri gagn að því að taka upp viðræður við talibana.

Samkvæmt frétt BBC telja talibanar að þeir séu að sigra í Afganistan og sjá því ekki hvers vegna þeir ættu að gera NATO þann greiða að ræða við bandalagið. Þeir telja að ákveðin upplausn sé til staðar í röðum Bandaríkjamanna eftir að fyrrum yfirmanni herliðs NATO í Afganistan, Stanley McChrystal, var vikið úr embætti í síðustu viku. Þá líta þeir á vangaveltur innan NATO um viðræður við talibana vera til marks um að bandalagið standi höllum fæti.

„Við viljum ekki tala við neinn, ekki Kazai forseta [Afganistans] né nokkurn útlending, fyrr en erlendir herir eru farnir frá Afganistan. Við erum sannfærðir um að við séum að sigra. Hvers vegna ættum við hefja viðræður þegar við erum með öll spil á hendi og erlendu herirnir eru að hugsa um að verða á brott og það eru deilur í röðum þeirra?" hefur BBC eftir Zabiullah Mujahedd, talsmanni skæruliða talibana.