Leiðtogi sjía-múslíma í Líbanon, sjeik Mohammed Hussein Fadlallah, lést í dag, 75 ára að aldri. Fadlallah var talinn andlegur leiðtogi Hisbollah hreyfingarinnar frá stofnun hennar árið 1982. Hann var hins vegar skilgreindur sem hryðjuverkamaður af stjórnvöldum í Bandaríkjunum.

Fadlallah lést á sjúkrahúsi í Beirút og var banamein hans innvortis blæðingar, samkvæmt heimildum AFP fréttastofunnar. Var hann lagður inn á sjúkrahús á föstudag vegna blæðinganna, samkvæmt BBC.

Á vef BBC kemur fram að þrátt fyrir að hann hafi verið skilgreindur sem hryðjuverkamaður af Bandaríkjunum þá naut hann mikils stuðnings meðal sjía-múslima. Hann er einn þeirra sem stóð á bak við íslömsku byltinguna í Íran árið 1979. Þrátt fyrir það var hann þekktur fyrir nútímaleg viðhorf meðal fylgismanna sinna. Til að mynda fyrir viðhorf sín gagnvart konum í íslömsku samfélagi.  Hann var eindreginn andstæðingur svokallaðra sæmdarmorða, þar sem karlmenn myrða konur í fjölskyldunni vegna gruns um að hafa átt ástarsamband við karla utan hjónabands.

Í júní í fyrra, þegar Frakkar deildu um hvort banna ætti búrkur, ásakaði  Fadlallah forseta Frakklands, Nicolas Sarkozy, um að banna konum að velja sér sjálfar föt.

Hann var einnig á móti heilögu stríði, jihad, Osama bin Laden og talibana í Afganistan.

Fadlullah fæddist í Írak árið 1935 í hinni helgu borg Najaf en fylgismenn hans er að finna í heimalandi hans, Líbanon, víða í Mið-Asíu og við Persaflóa, samkvæmt frétt Reuters.

Fadlullah var ásamt Hassan Nasrallah, leiðtoga Hisbollah, settur á svartan lista Bandaríkjamanna, yfir sérstaklega hættulega hryðjuverkamenn árið 1995. Var það forseti Bandaríkjanna á þessum tíma, Bill Clinton, sem ritaði undir listann. Á níunda áratugnum þegar borgarastríðið í Líbanon stóð sem hæst, héldu bandarískir fjölmiðlar því fram að Fadlallah stæði á bak við gíslatöku á bandarískum ríkisborgurum.

AFP fréttastofan segir að á sama tíma hafi aðrir fjölmiðar sagt að hann væri milligöngumaður í gísladeilunni en hvert hlutverk hans var hefur aldrei verið gefið upp. 

Klerkurinn lifði af nokkrur banatilræði. Meðal annars sprengjutilræði í Beirút þann 8. mars 1985 sem kostaði 80 óbreytta borgara lífið.