Maður á göngu í Lundúnum. Reuters

Breskur þingmaður hefur greint frá því að klámmynd hafi verið tekin upp á sjúkrahúsi í London. Þetta hafi gerst þegar sjúkrahúsið leigði út deild til kvikmyndafyrirtækis.

Penny Mordaunt, þingkona Íhaldsflokksins, segir að myndin hafi verið dýr í framleiðslu og að sjúkrahúsið hafi aflað töluverðra tekna með því að leigja út deildina.

Hún lét ummælin falla í umræðum þingmanna um aukið gegnsæi í ríkisfjármálum, en umræðan fór fram í neðri málstofu breska þingsins. Þetta kemur fram á vef breska útvarpsins.

Forsvarsmenn NHS Kensington and Chelsea, sem sér um rekstur sjúkrahússins, segja að myndin hafi verið tekin upp fyrir árið 2002 þegar svokallaður primary care trust var settur á laggirnar, sem hefur það hlutverk að reka heilbrigðisstofnir í Bretlandi.

„Þegar ég var yfirmaður Kensington and Chelsea ráðsins, þá komst ég að því að eitt af sjúkrahúsum okkar hefði leigt út deild, sem var lokuð en allur tækjabúnaður var til staðar, til kvikmyndafyrirtækis sem ætlaði að nota hana sem upptökuver,“ sagði Mordaunt.

„Til að bæta gráu ofan á svart, þá var þetta klámmynd,“ bætti hún við.

„Þrátt fyrir að ég geti ekki sagt að ég hafi séð myndina - þar sem svona myndir eru ekki lengur á meðal þess kostnaðar sem þingið greiðir fyrir - þá var þetta dýr mynd og aflaði töluverðra tekna fyrir sjúkrahúsið.“

Þá segir hún að ekki sé hægt að halda því fram að þarna hafi menn verið að framfylgja stefnu heilbrigðisyfirvalda.