Íslömsku samtökin Shabab í Sómalíu lýstu því yfir í dag, að þau bæru ábyrgð á sprengjuárásum, sem gerðar voru á tvö veitingahús í Kampala, höfuðborg Úganda í gærkvöldi. 74 að minnsta kosti létu lífið og tugir særðust en sprengjurnar sprungu þegar gestir voru að horfa á sjónvarpsútendingu frá úrslitaleik heimsmeistaramótsins í Suður-Afríku.

Við munum ráðast á óvini okkar hvar sem þeir eru niðurkomnir," sagði Sheik Ali Mohamud Rage, talsmaður Shabab í Sómalíu. „Enginn getur komið í veg fyrir að við uppfyllum okkar íslömsku skyldur."

Fyrr í dag sagði annar talsmaður samtakanna að hann væri afar glaður yfir fréttunum frá Úganda. „Við vitum að Úganda er andvígt íslamstrú og því erum við afar ánægðir með það sem gerðist í Kampala. Þetta eru bestu fréttir sem við höfum nokkru sinni heyrt," hafði Reutersfréttastofan eftir honum.

Í síðustu viku hvatti einn af herstjórum Shabab herskáa múslima til að ráðast á skotmörk í Úganda og Búrúndí en þessi tvö lönd hafa sent hermenn til Sómalíu til að taka þátt í friðargæslu á vegum Afríkusambandsins. 

Shabab-samtökunum hefur vaxið fiskur um hrygg vegna stríðsátakanna í Afganistan í Írak. Þetta er hins vegar í fyrsta skipti, sem samtökin standa fyrir árásum utan Sómalíu. Þau hafa tengsl við hryðjuverkasamtökin al-Qaeda og hafa einnig reynt að fá sómalska innflytjendur á Norðurlöndunum til liðs við sig. Danska öryggislögreglan sagði að 28 ára gamall Sómali, sem reyndi að ráða teiknarann Kurt Westergaard af dögum um síðustu áramót hefði tengsl við Shabab.