Blair brjálaður vegna uppljóstrana
Peter Mandelson fyrrverandi ráðherra Verkamannaflokksins, og höfundur bókarinnar The Third Man: Life at the Heart of New Labour sem vakið hefur miklar deilur innan flokksins. Reuters
Verkamannaflokkurinn í Bretlandi er í upplausn og hver höndin upp á móti hver annarri. Í nýútkominni bók Peters Mandelson, fyrrverandi ráðherra flokksins, sem nefnist Þriðji maðurinn, greinir hann í smáatriðum frá valdabaráttu og innanflokksátökum síðustu margra ára. Bókin hefur valdið flokksforystunni mikilli gremju og þannig mun Tony Blair, fyrrverandi forsætisráðherra og leiðtogi flokksins, vera brjálaður vegna útkomu bókarinnar.
Stutt er síðan 13 ára valdatíð Verkamannaflokksins í Bretlandi leið undir lok og því má segja að bókin komi út á versta tíma nú þegar flokkurinn er í sárum. Breska dagblaðið The Times hefur á síðustu dögum birt valda kafla úr bókinni við litla hrifningu flokksmanna.
Peter Mandelson var ásamt Tony Blair og Gordon Brown einn þriggja hugmyndafræðinga flokksins og lagði línurnar að nýja Verkamannaflokknum. Í bók sinni fer hann mjög náið í saumana á valdabaráttu og óeiningu Tonys Blair og Gordons Brown. Hann lýsir Brown m.a. sem valdasjúkum manni sem notað hafi öll meðöl til þess að koma Blair úr stóli forsætisráðherra þannig að hann sjálfur gæti tekið við. Hann segir Blair hafa verið veikgeðja og því ekki náð sem skyldi að koma böndum á Brown.
Í bók sinni upplýsir Mandelson einnig að Blair hafi í hádegisverði árið 2003 lofað Brown að hann myndi leyfa honum að leiða flokkinn í komandi þingkosningum og taka við forsætisráðherraembættinu. Samkvæmt Mandelson sveik Blair þetta loforð sitt með tilheyrandi neikvæðum áhrifum á samskipti leiðtoganna tveggja.
Bók Mandelsons þykir nokkuð umdeild, ekki síst þar sem hann vitnar orðrétt í Blair og Brown sem og fjölda persónulegra samtala og einkafunda. Eftir því sem fram kemur í bókinni taldi Blair að Brown væri „ruglaður, illur og hættulegur.“
Að mati flokksmanna í Verkamannaflokknum mun bókin hjálpa nýju ríkisstjórn Íhaldsflokksins og Frjálsra demókrata. Þannig er talið að David Cameron, forsætisráðherra, leiðist ekki þær upplýsingar sem fram komi í bókinni. Hann hefur óspart notað hvert einasta tækifæri sem gefist hefur á síðustu dögum til þess að vitna í eða vísa til bókarinnar.
Tony Blair Reuters
Gordon Brown Reuters
