Lene Espersen.

Lene Espersen, utanríkisráðherra Dana, komst ekki til Kabúl, höfuðborg Afganistans, þar sem hún ætlaði að sitja ráðstefnu um málefni landsins og morgunverðarfund, ásamt Hillary Clinton, utanríkisráðherra Bandaríkjanna, og fleirum, þar sem rætt var um stöðu kvenna í Afganistan.

Flugvél Espersen var snúið frá flugvellinum í Kabúl í gærkvöldi vegna eldflaugaárásar, sem talibanar gerðu á flugvöllinn.  Á endanum lenti flugvél danska ráðherrans á flugvellinum í Almaty í Kasakstan og brottförin þaðan í morgun tafðist nokkuð vegna reglna um hvíldartíma áhafnarinnar. 

En þegar Espersen og fylgdarlið voru komin út á flugvöll í Kasakstan kom í ljós, að stjórnvöld í Úsbekistan vildu ekki veita flugvél ráðherrans leyfi til að fljúga yfir landið. Á endanum neyddist Espersen til að snúa við.

Í viðtali við Berlingske Tidende segir Espersen, að þessi afstaða Úsbeka flokkist undir áreitni. Hefur danska utanríkisráðuneytið nú krafist skýringa á þessu hjá sendiherra Úsbekistan í Kaupmannahöfn.   

Þetta er í annað skipti sem Espersen missir af fundi með Hillary Clinton. Í vetur sleppti hún því að fara á fund í Kanada um málefni norðurslóða og fór þess í stað í frí til Mallorca. Sætti hún mikilli gagnrýni í Danmörku fyrir það.