Barack Obama, forseti Bandaríkjanna, kom fram í spjallþættinum "The View" í New York í dag. F.v.: Barbara Walters, Obama, Joy Behar, Sherri Shepherd og Elisabeth Hasselbeck. Reuters

Barack Obama, Bandaríkjaforseti, barðist hart fyrir því að fá að halda BlackBerry farsímanum sínum þegar hann tók við forsetaembætti. Nú hafa ekki nema tíu manns heimild til að senda tölvupóst í pósthólfið sem er girt öryggisvörnum í bak og fyrir. Forsetinn viðurkenndi í dag að það væri „ekki gaman“.

Obama kom fram í spjallþættinum The View á ABC sjónvarpsstöðinni. Það var í fyrsta sinn sem sitjandi forseti Bandaríkjanna kom fram í spjallþætti að degi til. Forsetinn upplýsti að einungis tíu manns kunni tölvupóstfangið að BlackBerry símanum sem hann fékk úthlutað. 

Þá sagði hann að póstsamskiptin séu með stirðara móti því skeytin verði líklega geymd í skjalasöfnum með öðrum skjölum Hvíta hússins. 

„Ég verðað viðurkenna að þetta er ekkert skemmtilegt, því þau halda að þetta falli líklega undir lög um skjöl forsetans svo það er ekki nokkur maður sem sendir mér neitt virkilega safaríkt,“ sagði Obama í sjónvarpsþættinum.

„Þetta er allt mjög formlegt. Herra forseti, það líður að fundi og við viljum gjarnan upplýsa þig.“ Obama var fús til að upplýsa hvaða efni hann geymdi í iPod spilastokknum sínum. Þar reyndist vera tónlist af fjölbreyttu tagi, m.a. lög með Jay-Z, Frank Sinatra og óperudrottningunni Maria Callas.