Jan Brewer ríkisstjóri í Arizona í Bandaríkjunum segist ætla að áfrýja niðurstöðu dómara sem dæmdi hluta af nýrri innflytjendalöggjöf í fylkinu ólöglega. Það var alríkisstjórnin í Washington sem höfðaði málið þar sem hún taldi að einstök fylki í Bandaríkjunum gætu ekki sett ákvæði í  lög um innflytjendamál.

Dómurinn var birtur aðeins nokkrum klukkutímum áður en löggjöfin átti að taka gildi. Þeir sem barist hafa gegn löggjöfinni fögnuðu innilega þegar fréttist af niðurstöðu dómarans.

Meðal ákvæða laganna er að lögregla megi kanna hvort fólk sem hún hefur stöðvað er löglega skráð í fylkið. Einnig gera lögin ráð fyrir að það sé lögbrot að vera ekki með skírteini sem sannar að viðkomandi sé löglega skráður í fylkið. Þessi ákvæði felldi dómarinn úr gildi.

Meðal ákvæða laganna sem fá að halda sér er ákvæði um að það sé lögbrot að flytja ólöglega innflytjendur innan fylkisins eða til þess.

Ríkisstjóri Arizona líkti niðurstöðu dómstólsins við hindrun á vegi sem menn vissu ekki alveg til hvers myndi leiða. Talið er líklegt að málið endi hjá Hæstarétti Bandaríkjanna.

Tilgangur laganna var að reyna að takmark flæði ólöglegra innflytjenda frá Mexíkó.