Prestar úkraínsku Réttrúnaðarkirkjunnar, sem nýtur ekki opinberrar viðurkenningar, tóku þátt í hátíðarhöldum í tilefni af kristnitökunni árið 988. Þeir eru hér fyrir framan minnismerki um Valdimar prins sem ákvað að gera kritna trú að ríkistrú. Reuters

Rússar fengu nýjan almennan frídag í gær þegar dagurinn var helgaður kristnitöku þar um slóðir árið 988. Þykir þetta til marks um stuðning stjórnvalda í Kreml við Réttrúnaðarkirkjuna, en vegur hennar hefur vaxið mjög eftir fall kommúnismans.

Fréttavefur Yahoo! greinir frá því að mannréttindahópar hafi gagnrýnt nýja frídaginn sem Dmitry Medvedev samþykkti að taka upp, og segi hann draga úr gildi ókirkjulegrar stjórnarskrár Rússlands. Þá hafa talsmenn múslíma sagt að ákvörðunin útiloki þá.

Kirill, patríarki Rússnesku rétttrúnaðarkirkjunnar, hélt helgiatöfn í Kiev, höfuborg Úkraínu nútímans. Borgin var höfuðborg Kievan Rus á miðöldum en Valdimar prins og þáverandi þjóðhöfðingi ákvað að kristni skyldi verða ríkistrú fyrir meira en þúsund árum. Kievan Rus er álitið vera forveri Rússlands, Úkraínu og Hvíta-Rússlands nútímans.

„Við eru staðföst í trú okkar á Guð þrátt fyrir að horfast í augu við hatrammt guðleysi og vaxandi heiðindóm,“ sagði Kirill patríarki í ræðu sem hann flutti við Pecherska Lavra klaustrið í Kiev.

Trúarvakning hefur verið í Rétttrúnaðarkirkjunni frá falli Sovétríkjanna fyrir um tveimur áratugum. Þá lauk áratugalangri kúgun kommúnista gagnvart kirkjunni. Leiðtogar Rússlands hafa viðurkennt Réttrúnaðarkirkjuna sem aðalkirkju landsins.

Vladimir Putin, forsætisráðherra Rússlands, sagði á mánudag að kristnitaka Rússa hafi fært landið nær Evrópu. Samkomur voru haldnar víða um Rússland í gær í tilefni dagsins. Hundruð trúaðra komu m.a. saman á Rauða torginu í Moskvu og veifuðu fánum og sungu sálma.