Lögregla að störfum í Villers-au-Tertre í gærkvöldi. Reuters

Íbúar í franska bænum Villers-au-Tertre eru skelfingu lostnir vegna frétta um, að átta barnslík hafi fundist í tveimur húsum og húsagarði í bænum. Hjón á fimmtugsaldri hafa verið handtekin en þau hafa búið í Villers-au-Tertre í að minnsta kosti 15 ár og maðurinn var nýlega kjörinn í bæjarráðið. 

„Ég er enn agndofa," sagði Daniel Collignon, fyrrverandi bæjarstjóri  Villers-au-Tertre, þar sem um 700 manns búa.

Nágrannar hjónanna lýstu einnig mikilli undrun. „Þau eru venjulegt fólk sem gegndi mikilvægu hlutverki í samfélaginu," sagði einn nágranninn. „Þetta er ótrúlegt." 

Maðurinn vann við byggingarvinnu og konan var aðstoðarmaður á hjúkrunarheimili. Þau eiga tvær uppkomnar dætur og barnabörn, að sögn eins íbúans. Ein unglingsstúlka sagði, að dætur hjónanna væru vingjarnlegar og að móðirin væri einföld og þögul kona, sem gæti ekki gert flugu mein. 

Málið kom upp þegar nýir eigendur húss í bænum hringdu á lögreglu á laugardag og sögðust hafa fundið beinagrindur af börnum grafnar í garðinum. Húsið var áður í eigu foreldra konunnar, sem síðan var handtekin.

Lögregla hefur fundið tvö barnslík í garðinum.  Lögregla handtók síðan hjónin, sem búa í húsi í um kílómetra fjarlægð frá húsinu þar sem fyrstu líkin fundust. Þar fundust sex lík til viðbótar. Öll voru þau af nýfæddum börnum, vafin í plast. 

Franska útvarpsstöðin   RTL segir, að konan hafi viðurkennt fyrir lögreglu að hafa orðið börnunum að bana. Þá hafi hún sagt, að hún hafi myrt fleiri börn eftir fæðingu en þau átta sem nú hafa fundist.

Mál af þessu tagi hafa áður komið upp í Frakklandi á síðustu áratugum.  Í fyrra var 41 árs gömul kona dæmd í 8 ára fangelsi fyrir að verða þremur börnum að bana.