Silvio Berlusconi (t.v.) ræðir við Giulio Tremonti, viðskiptaráðherra Ítalíu, á ítalska þinginu. Reuters

Silvio Berlusconi, forsætisráðherra Ítalíu, heldur því fram að samsteypustjórnin muni ekki liðast í sundur þrátt fyrir brotthvarf Gianfranco Fini, sem einn af stofnendum Il Popolo della Libertà (PDL), flokks Berlusconis.

Berlusconi og bandamenn hans í PDL fóru fram á það að Fini léti af embætti sem forseti neðri deildar ítalska þingsins, en þeir segja að það sé ekki hægt að vinna með honum. Nokkrir þingmenn, sem eru hliðhollir Fini, segja að þeir líti ekki lengur á sjálfa sig sem flokksmenn PDL, segir á vef breska útvarpsins.

Berlusconi segir að hann hafi enn meirihluta á þingi. Engin hætta sé fyrir hendi.

Fini og Berlusconi hafa deilt hatrammlega um siðferði og lögmæti í ítalskri pólitík.

Fini er þeirrar skoðunar að stjórnmálamenn sem hái baráttu fyrir dómstólum eigi að segja af sér. Þá átti Fini þátt í því að neyða Berlusconi til að þynna út umdeilt hlerunarfrumvarp, sem gekk út á það að takmarka fréttaflutning fjölmiðla um hleranir sem fjallað er um í dómsmálum.

Það er búið að rétta margoft yfir Berlusconi, en hann hefur margsinnis verið sakaður um spillingu. Hann hefur ávallt neitað sök og þá hefur hann ávallt verið hreinsaður af öllum ásökunum.

Menn telja að deilurnar geti leitt til þess að ríkisstjórn Berlusconi muni riða til falls fyrir 2013, en þá lýkur núverandi kjörtímabili.

Gianfranco Fini hefur verið forseti neðri deildar þingsins. Reuters