Robert Gates Reuters

Varnarmálaráðherra Bandaríkjanna, Robert Gates, segir Wikileaks vefinn sekan um siðferðisbrot fyrir að hafa birt bandarísk leyniskjöl um stríðið í Afganistan. Segir Gates að birting gagnanna væri ófyrirleitin. Hann segir ekki ljóst hvort Wikileaks eigi yfir höfði sér málssókn vegna leka á 92 þúsund leyniskjölum um Afganistan.

„Það er mín afstaða að um tvennskonar saknæmi sé um að ræða," sagði Gates í viðtali í sjónvarpsþættinum This Week á  ABC sjónvarpsstöðinni í dag.

Í fyrsta lagi brot á refsilögum og það er í höndum dómsmálaráðuneytisins og fleiri aðila sagði Gates í viðtalinu og tók fram að það væri ekki á hans sviði. Hins vegar hafi Wikileaks vefurinn gerst sekur um siðferðisbrot. Wikileaks hafi sett gögnin inn á vefinn án þess að taka tillit til annarra og hverjar afleiðingarnar kunni að verða.

Gates, sem er fyrrum sérfræðingur hjá bandarísku leyniþjónustunni, CIA, og síðar yfirmaður CIA, segir að ekki megi rjúfa friðhelgi heimildamanna en lekinn grafi undan því trausti sem ríkja á milli heimildarmanna og CIA.   

Vísar hann þar til þess að meðal þess sem Wikileaks lak á netið voru nöfn á þeim sem vinna með Bandaríkjunum í Afganistan. 

Á sama tíma og bandaríska varnarmálaráðuneytið, Pentagon, og bandaríska alríkislögreglan, FBI, rannsaka málið þá segir stofnandi Wikileaks, Julian Assange, að lekinn geti hjálpað almenningi við að mynda sér skoðun á stríðinu í Afganistan.

Julian Assange stofandi Wikileaks. Reuters