Hollenska unglingsstúlkan Laura Dekker, sem ætlar sér að verða sú yngsta til að sigla ein umhverfis jörðina á skútu, lagði úr höfn í Portúgal í morgun. Hollenskur dómstóll úrskurðaði í síðustu viku að hinni 14 ára gömlu Dekker væri heimilt að sigla ein umhverfis jörðina.  

Tugir fylgdust með er hún lét úr höfn í Den Osse, sem er hennar heimahöfn, en faðir hennar ætlar að fylgja henni fyrsta áfangann, til Portúgals.

Dekker ætlar sér að ljúka ferðinni á tveimur árum og verður hún að ljúka siglingunni á bátnum Guppy fyrir september 2012 er hún verður sautján ára, til þess að slá heimsmetið.

Ástralska stúlkan Jessica Watson, 16 ára, er í dag yngsti sæfarinn sem siglt hefur hringinn í kringum hnöttinn. Watson var 210 daga á leiðinni og lauk ferðalaginu í maí sl.

Dekker var í kjölfar dómsins í síðustu viku tekin úr umsjón hollenskra barnaverndaryfirvalda, sem hafa haft forræði yfir henni frá því í október í fyrra er dómstóll í Utrecht bannaði för hennar. Reyndu barnaverndaryfirvöld að fá forræði sitt framlengt um ár, en fjölskyldudómstóllinn í Middelburg hafnaði beiðninni. „Ábyrgð á Lauru hvílir nú hjá foreldrum hennar,“ sagði dómarinn S. Kuypers. Það er þeirra að ákveða hvort hún geti lagt af stað.“

Foreldrar hennar, sem eru fráskilin, segjast bæði styðja tilraunina, þó móðir hennar hafi upphaflega verið mótfallin siglingaráformunum.